Sur da nus
La gronda part da las Svizras e dals Svizzers che discurran rumantsch viva oz en territoris betg rumantschs. Ils blers Rumantschs e tut ils auters fans da nossa bella lingua duain dentant era pudair giudair occurrenzas culturalas rumantschas en la Bassa. Quai vulain nus cuntanscher cun nossa nova uniun "Cultura Rumantscha en la Bassa" cun organisar e realisar diversas occurrenzas culturalas en la Bassa. Per crear experientschas cuminaivlas per il dumber adina pli grond da Rumantschas e Rumantschs en la Bassa, ma era per render pli enconuschenta la cultura rumantscha a la populaziun svizra interessada.
Noss motto, suenter qual nus lavain, è tenor Berthold Auerbach: "In'idea sto pudair daventar realitad, uschiglio è ella ina borla da savun plain."
Per pudair realisar nossas visiuns essan nus dependents da sustegn finanzial. Legiai per quai nossa brev a donaturs/la dumonda per sustegn finanzial u regalai directamain sur ina donaziun:
La suprastanza
Gion Fry
President
Gioni Fry (*1970), da Mustér, abitescha a Horgen. Graficist scolà e rockadur passiunà; maina atgna agentura da reclama e communicaziun (toc) a Turitg. Sia chasa editura Ediziuns Apart ha t.a. publitgà la versiun rumantscha dal «Hobbit» da Tolkien.
Anita Simeon Lutz
Actuara
Anita Simeon Lutz (*1972), da Lantsch, abitescha a Neerach/ZH. Architecta diplomada. Ella è stada passa 10 onns schefredactura da «Das ideale Heim» e lavura actualmain tar Samariter Schweiz. Ultra da quai curatura tar Zurich Design Weeks.
Corsin Derungs
Vicepresident
Corsin Derungs (*1951), da Danis GR, abitescha a Baar ZG. Fundatur da l'uniun CRB / Cultura Rumantscha en la Bassa. Pensiunà. El è stà blers onns emploià commerzial tar la polizia d'esters dal chantun Zug. Ultra da quai è el stà president dal Chor viril rumantsch da Zug.
Remo Arpagaus
Decor, culissa
Remo Arpagaus (*), creschì si a Laax, ha absolvì il seminari da magisters a Cuira ed ha studegià musica al conservatori da Turitg. Studi sco decoratur da tribuna e designer da performance al Central Saint Martins College of Art and Design a Londra. Scenograf liber che porscha soluziuns per tribunas, per events e per exposiziuns.