L'onn da la(s) decisiun(s)

Preziadas Rumantschas, preziads Rumantschs da la Bassa

L’onn 2025 ha la CRB – ensemen cun ils partenaris dal comité d'organisaziun FESTIVALET – gì il curaschi da far ina gronda festa rumantscha a Turitg. Quel success ha demussà che lavurond ensemen san ins era survegnir grond sustegn dal Chantun Grischun, dal’Uffizi federal da cultura (UFC) e dad auters sponsurs. Gist quest atun ha il Cussegl federal danovamain pretendì ch’il linguatg e la cultura Rumantscha duajan survegnir dapli sustegn en la diaspora.

La promoziun da la diaspora ha a disposiziun davart da l’UFC ina summa maximalada 400'000 francs ad onn, e quai dapi l’onn 2021 (guarda: Promoziun da la lingua e cultura rumantscha ordaifer la Svizra rumantscha). Quels daners vegnan repartids directamain a projects, sco capità per exempel tar il FESTIVALET. Las cundiziuns per il sustegn da projects èn definidas en il mussavia (guarda annexa).

«Jau vi engraziar fitg a tai, Corsin, per la fidanza che ti has tschentà en mes umens dal Chor viril Surses ed era en mai. Las duas represchentaziuns lantschadas l’onn passà tras tai han chaschunà bler tar nus ed jau gughegel da dir: nus essan sin in curs fitg allegraivel. I va per persunas (spezialas) che vesan il potenzial e la substanza e che fan la dretga chaussa il dretg mument. Ti es ina da quellas persunas. Grazia fitg!»

Rainer Held, Dirigent Chor viril Surses

Suenter ils success dal FESTIVALET e dal concert extendì a Faveras/Pfäfers(organisà ensemen cun l'uniun Rumantscha Rezia Bassa) ha la CRB CulturaRumantscha en la Bassa decidì da continuar era l’onn 2026 cun sias activitads. Uschia sustegna ella era l’dea da las famiglias da Berna da vulair far mintg'onn ina festa rumantscha en la diaspora, preferiblamain adina en in auter lieu. En in discurs cun RTR di Robert Buchli cun raschun ch’igl è la responsabladad dals creschids rumantschs dad oz da dar vinavant noss linguatg e la cultura als uffants taidla(https://www.rtr.ch/novitads/svizra/festa-da-stad-rumantscha-in-inscunter-per-tut-las-generaziuns.)

Nus stuain lavurar ensemen cun la Lia Rumantscha e cun la URB (Uniun da las Rumantschas e dals Rumantschs en la Bassa) e mussar a quellas instituziuns che nus quintain cun lur sustegn en l'entira diaspora – la CRB stat en discussiun tant cun l’ina sco cun l’autra. Ed ella è engraziaivla per mintga sustegn er da vossa vart.

En quest senn giavischain nus a vus tuttas e tuts bellas festas ed in bun e fritgaivel onn nov.

CRB Cultura Rumantscha en la Bassa

Corsin Derungs, president

Benedetto Vigne, actuar e president FESTIVALET